سياسة الخصوصية
سبليتر تطبيق لتقسيم المصاريف المشتركة بين مجموعة. هذي السياسة توضّح وش نجمع من بياناتك، وليش، ومين يشوفها، وكيف تحذفها.
البيانات اللي نجمعها
- بيانات الحساب: اسم المستخدم، واسمك، وبريدك الإلكتروني (لاستعادة الحساب)، وكلمة المرور مشفّرة — ما نقدر نقرأها.
- إذا دخلت عن طريق Apple: معرّف تعطينا إياه Apple لحسابك عندنا، واسمك وبريدك إذا شاركتهم (تقدر تخفي بريدك، فيوصلنا بريد من Apple يحوّل لبريدك). ما توصلنا كلمة مرور Apple.
- رقم الجوال، إذا أضفته: عشان يقدر منشئ النشاط يدعوك برقمك. البحث بالرقم كامل فقط، وما يظهر للباحث إلا اسم العرض.
- اللي تضيفه في التطبيق: الأنشطة، والمصاريف (الوصف والمبلغ والتصنيف والتاريخ)، والتقسيم، والتسويات وتأكيداتها، والصندوق، وأدوار الجمعية.
- تفضيلاتك: لغة التطبيق وإعدادات الإشعارات.
- بيانات الدخول: نوع الجهاز ونسخة التطبيق لكل جهاز دخلت منه، عشان تقدر تطلع منه وعشان أمان حسابك. وإذا سمحت بالإشعارات، رمز الإشعارات لجهازك عشان نوصل له.
- سجلات تقنية قصيرة الأمد (مثل عنوان IP ووقت الطلب) لحماية الخدمة من إساءة الاستخدام.
- الملاحظات والشكاوى اللي ترسلها من التطبيق: نصها ونوعها، مع حسابك (اسم المستخدم والبريد) عشان نرد عليك برقم التذكرة، ونوع الجهاز ونسخة التطبيق ولغته. إذا حذفت حسابك تبقى الملاحظة بدون اسمك.
اللي ما نجمعه
- ما نجمع أي بيانات بنكية ولا أرقام بطاقات، وما يمرّ عبر التطبيق أي مال بينكم. التحويلات بين الأعضاء تصير خارج التطبيق.
- ما نستخدم موقعك، وما نقرأ جهات اتصالك. إذا اخترت شخص من جهات الاتصال عشان تدعوه، يوصل للتطبيق الرقم اللي اخترته بس، ونبحث فيه عن حسابه بدون ما نحفظه.
الصور والكاميرا
تقدر تحط صورة للنشاط تختارها من صورك أو تصوّرها. يوصل للتطبيق الصورة اللي اخترتها بس، وما يفتح الكاميرا إلا بعد إذنك. نحفظ الصورة عندنا، ويشوفها أعضاء النشاط فقط، وتنحذف إذا شلتوها أو انحذف النشاط.
قد نضيف لاحقاً إرفاق صورة الفاتورة بالمصروف، بنفس الطريقة: يشوفها أعضاء النشاط فقط، وتنحذف مع المصروف.
الإعلانات
قد يعرض التطبيق إعلانات. قبل إضافتها نحدّث هذي السياسة بأسماء شركاء الإعلانات والبيانات اللي يستخدمونها، وما نتتبّعك عبر تطبيقات أو مواقع جهات أخرى إلا بإذنك.
الاشتراكات والمدفوعات
بعض الميزات قد تكون مدفوعة. الدفع يتم عبر App Store أو Google Play، وما نستلم بيانات بطاقتك؛ يوصلنا من المتجر ما يثبت اشتراكك فقط.
كيف نستخدم بياناتك
- لتشغيل الخدمة: حساب المبالغ والتسويات، وعرض النشاط لأعضائه، وإرسال إشعارات النشاط.
- لإرسال رموز التحقق واستعادة الحساب على بريدك.
- لحماية حسابك والخدمة.
- لمتابعة الخدمة بأرقام إجمالية فقط (مثل عدد المستخدمين الجدد والأنشطة)، بدون بيانات أي شخص بعينه.
مين يشوف بياناتك
- أعضاء النشاط يشوفون اسمك واللي تضيفه داخل ذلك النشاط فقط. بريدك ورقم جوالك ما يظهرون لهم.
- مزوّدون يشغّلون الخدمة نيابة عنا: الاستضافة وقاعدة البيانات، وإرسال البريد، وخدمات إشعارات آبل وقوقل، والدخول عن طريق Apple، وواتساب (من Meta) لإرسال رمز التحقق من رقم الجوال، ومتجرا آبل وقوقل للمدفوعات. يعالجون البيانات لهذا الغرض فقط، ونضيف هنا أي مزوّد جديد (مثل الإعلانات) قبل استخدامه.
- بعض هؤلاء المزوّدين خارج المملكة، مثل خدمة إرسال البريد وخدمة إشعارات آبل وواتساب. نرسل لهم أقل ما يلزم فقط: بريدك أو رقم جوالك ورمز التحقق، ونص الإشعار.
- الجهات الرسمية إذا ألزمنا النظام بذلك.
حذف حسابك
تقدر تحذف حسابك من التطبيق (الإعدادات ← حذف الحساب) أو من صفحة حذف الحساب في هذا الموقع.
ينحذف اسم المستخدم والبريد ورقم الجوال وكلمة المرور ودخولك من كل الأجهزة وإشعاراتك، وينفصل حسابك عن Apple إذا كنت تدخل عن طريقها. يبقى اسم العرض على المصاريف المشتركة حتى تبقى حسابات باقي الأعضاء صحيحة، وتنتقل إدارة أنشطتك لأول مشرف فيها، وإلا لأقدم عضو.
مدة الاحتفاظ
نحتفظ ببياناتك ما دام حسابك موجوداً، وإذا حذفته ينحذف منها اللي فوق. الإشعارات تنحذف بعد ٩٠ يوماً، وتقدر تحذفها قبل من التطبيق. السجلات التقنية نحتفظ بها لفترة قصيرة فقط.
حقوقك
لك تعرف وش عندنا من بياناتك، وتصحّحها، وتطلب نسخة منها، وتحذفها. أغلب هذا تقدر تسويه بنفسك من التطبيق، والباقي راسلنا على info@usesplitter.com ونرد عليك خلال ٣٠ يوم.
حماية بياناتك
الاتصال بالتطبيق مشفّر (HTTPS)، وكلمات المرور ورموز الدخول محفوظة مشفّرة بحيث ما يمكن استرجاعها حتى لو تسرّبت قاعدة البيانات.
التعديلات وتواصلك معنا
إذا غيّرنا هذي السياسة نحدّث التاريخ أعلى الصفحة، وننبّهك داخل التطبيق إذا كان التغيير جوهرياً.
لأي سؤال عن بياناتك راسلنا على info@usesplitter.com